Xəbərlər
"Kibercinayətkarlığa Qarşı Əməkdaşlıq " Mövzusunda Geniş “Octopus” Tədbiri Keçirilmişdir
2021-11-29
2011-ci ildən Avropa İttifaqı və Avropa Şurasının The CyberEast proqrqamı çərçivəsində Kibercinayətkarlıqla bağlı layihələr davam etdirilir, silsilə tədbirlər keçirilir. Layihənin əsas məqsədi Kibercinayətkarlığa qarşı mübarizədə elektron sübutlardan istifadə etməklə beynəlxalq əməkdaşlığı gücləndirmək və cinayətkarlıqla mübarizə aparan orqanlar və internet şəbəkələri arasında xüsusi tərəfdaşlıq münasibətlərinin qurulmasından ibarətdir. Respublikamız altı Şərq Tərəfdaşlığı ölkələrindən biri kimi bu layihədə 2019-cu ildən təmsil olunur.Həmin tədbirlər silsiləsinə 2021-ci ilin 16-18 noyabr tarixində Avropa Şurasının Kibercinayətkarlıqla Mübarizə Şöbəsinin tərəfindən və Macarıstan Nazirlər Komitəsinin sədrliyi ilə distant formada keçirilən geniş “Octopus” konfransda “Kibercinayətkarlıq haqqında” Budapeşt Konvensiyasının və onun 2-ci əlavə Protokolun genişləndirilməsi və elektron sübutların açıqlanması məsələləri qeyd edilmişdir. Konfransda dövlət və özəl sektorların, eləcə də dünyanın bir çox yerindən olan beynəlxalq və qeyri-hökumət təşkilatlarının kibercinayətkarlıq üzrə ekspertləri öz təcrübələri barədə fikir mübadiləsi aparmaq imkanı əldə etmişlər.3 gün ərzində davam edən tədbirdə ölkəmizi Ədliyyə Akademiyasının, prokurorluq orqanlarının əməkdaşları, vəkilər və Bakı Dövlət Universitetinin Hüquq fakültəsinin tələbələri təmsil etmişlər. Kiberməkanda baş verən cinayət hadisələrini əhatə edən bu konfrans çoxsaylı sessiyalar formasında aparılmış,sessiyalarda beynəlxalq ekspert məruzəçiləri tərəfindən strateji yanaşmalar, təlimçilər şəbəkəsi və məhkəmə təlimi üçün onlayn platforma kimi vasitələr barəsində məlumatlar verilmişdir. İşıqlandırılan mövzuların genişliyi ilə səciyyələnən konfransda 2022/2023-cü illərdə kiber təhdidlər, tendensiyalar və hüquq mühafizə orqanlarının hazır olmalı olduğu çağırışlarla bağlı proqnozlar ən ümdə məsələlər kimi vurğulanmış və xüsusi hədəfin kiberməkanda insan hüquqları və qanunun aliliyinin təmini olması qeyd edilmişdir.